№36 сайлау учаскесі Атырау қалалық білім бөлімінің Д.Байбосынов атындағы №13 мектеп-гимназиясының ғимаратында орналасқан. Науқанның тиісті деңгейде өтуі, сайлаушылар қолайлылығы үшін қажеттіліктер толық қамтамасыз етілген.
Ең алғашқы сайлаушы сағат 6:45-те келді. Учаске дәл уақытында ашылып, Қазақстан Республикасының Гимні орындалған соң, жұмысын бастады.
Залдың ортасында дауыс беру жәшігі бар, оның жанында тасымалданатын түрі орналасқан. Байқаушылар мен комиссия мүшелеріне барлық жағдай жасалған.
№36 учаскелік сайлау комиссиясының төрағасы Досжан Болатбекұлының айтуынша, учаскеде 2468 сайлаушы тіркелген.
«Үш адам үйден дауыс береді. Сонымен қатар, басқа сайлау учаскесінде дауыс беруге ниет білдірген сайлаушыларға 9 сайлау бюллетені берілді» – деп хабарлады Досжан Болатбекұлы.
Алғашқы минуттарда бірнеше адам дауыс берді. Олардың қатарында қала тұрғыны Ағила Балғымбаева да бар. «Көтеріңкі көңіл-күймен келдім, балаларымның болашағы үшін өз таңдауымды жасадым» дейді қала тұрғыны жымиған кейіппен.
Сайлау барысын түрлі партиялар мен қоғамдық ұйымдардың өкілдері бақылап отыр.
– Ешқандай заңбұзушылық жоқ, дауыс беру қалыпты өтуде, – дейді байқаушылардың бірі Әлібек Сейітов.
Светлана НОВАК
Фотоны түсірген автор
