Атыраулық студент пауэрлифтингтен әлем чемпионы атанды

UTEBAYEV UNIVERSITY Ақпараттық технологиялар факультетінің студенті Аманжол Салық халықаралық аренада елімізді тағы бір мәрте танытып, үлкен жетістікке қол жеткізді. Бішкек қаласында өткен пауэрлифтингтен әлем чемпионатында өнер көрсеткен жас спортшы 2 алтын және 1 күміс медальді жеңіп алды.

Университеттің баспасөз қызметінің хабарлауынша, бұл нәтиже оның спорттық өміріндегі үлкен жетістік болып саналады әрі жастарға үлгі.

Аманжол Салық ауыр салмақтағы зіл темір көтеру және стендтік пресс бойынша әлем чемпионы атанып, қарсыластарының алдында үлкен басымдық көрсетті. Халықаралық пауэрлифтинг сайысының жоғары деңгейдегі додасында ол өзінің дайындығы мен қайсарлығын дәлелдеп, қола жүлдеге де ие болды. Бұл жеңістің артында сансыз жаттығулар, төккен тер мен тынымсыз еңбек жатыр.

–Спортты серік етіп, білімін де шыңдап жүрген Аманжол болашақта мұнай-газ саласындағы ақпараттық технология маманы болуды көздейді. Оның бұл екі саланы қатар алып жүруі жастарға айтарлықтай үлгі. Атыраулық студентке алдағы уақытта да тек сәттілік тілейміз, — дейді университеттің баспасөз қызметінің өкілдері.

Алтыншаш НӘСІПҚАЛИҚЫЗЫ