Атыраулық спортшы ел чемпионы атанды (+ФОТО)

Атыраулық спортшы Сырбаз Талғат 70 келі салмақта өнер көрсетіп, ел чемпионы атанды.

20-21 қараша күндері Алматы қаласында еркін күрестен ел біріншілігі өтуде. Бұл ұлттық құрамаға іріктеу болғандықтан, мұнда еліміздің ең мықты деген балуандары белдесуде. Жарыстың алғашқы күні, 20 қарашада 57, 61, 86 келі салмақта чемпиондар анықталды. Бүгін, 65, 70 және 97 келіге дейінгі салмақтағы балуандар боз кілемге шықты. Әлемнің және Азия құрлығы чемпионаттарының жүлдегері индерлік Сырбаз Талғат чемпион болды. Ол жартылай финалда қарағандылық Ғалымжан Иадулланы 9:3 есебімен ұтса, ақтық сында шымкенттік Нұржан Сейтжановты таза жеңді.

Сөйтіп, екінші орынды шымкенттік Нұржан Сейітжан алса, үшінші орын Алматы облысының балуаны Е.Тәңірбергенов пен Солтүстік Қазақстаннан келген С.Бейсаловқа бұйырды.

Енді еркін күрес шеберлері 22 қарашада 74, 79, 92, 125 келі салмақта сынға түседі. Ал әйелдер күресінен 23 қарашада 10 қарашада жүлделер сарапқа салынса, грек-рим күресінің шеберлері 24-26 қараша аралығында тоғыз салмақта жүлдеге таласады.

Айта кеткен жөн, Сырбаз – бұған дейін де жастар арасында екі дүркін әлем чемпионатының күміс жүлдегері және Азия чемпионы болып табылады.

Амандық САҒЫНТАЙҰЛЫ