Атыраулық полицейлер үздік атанды
Атырау қаласында облыстық полиция департаментінің ұйымдастыруымен Қазақстан Республикасы Ішкі істер министрлігінің XII Спартакиадасы аясында қоян-қолтық ұрыстан чемпионат ұйымдастырылды. Бұл жолғы додаға еліміздің барлық өңірлерінен 30-дан астам команда жиналып, мықтылар татами төрінде бақ сынасты.
Тартысты өткен жарыстың қорытындысы бойынша Атырау облысының командасы жалпы есепте қарсыластарынан озық шығып, 4 алтын, 2 күміс және 3 қола медаль жеңіп алды. Осылайша жерлестеріміз үздік нәтиже көрсетіп, командалық есепте бірінші орынға тұрақтады. Екінші орын Маңғыстау облысының командасына бұйырса, үшінші орынды табандылық танытқан Астана қаласының спортшылары иеленді.
Жекелей сындарда Атырау облысы атынан сынға түскен 65 келі салмақ дәрежесінде Гүлбану Саматова, 73 келіде Қуандық Бекназаров, 88 келіде Нұрберген Мырзаекен, 97 келіде Эльдар Мұхитов алтын медальға қол жеткізді. Ал 67 келіде Әли Өтеген мен 62 келіде Асхат Оралбаев күміс жүлдегер атанды. Қола жүлде 57 келіде Қайырбек Хабиболлаға, 80 келіде Қазыбек Сапеновке және 52 келіде Зарина Келісоваға бұйырды.
Жарыс соңында ерекше нәтиже көрсеткен қызметкерлер Атырау облысы полиция департаменті бастығының Алғыс хаттарымен және бағалы сыйлықтарымен марапатталды. Әсіресе, 88 келі салмақ дәрежесінде чемпион атанған Нұрберген Мырзаекеннің жеңісі көптің назарын аударды. Ол бұған дейінгі жарыстарда да облыс намысын қорғап, қарсыластарынан басым түсіп жүрген тәжірибелі спортшы. Оның анасы Айнагүл Жолдыбаева ұлының жарысқа небары бір апта қалғанда 13 келі салмақ тастап, үлкен дайындықпен шыққанын атап өтті. Табандылығы мен еңбегінің арқасында әрдайым жеңіс тұғырынан көрініп жүрген Нұрберген ата-анасының да, облыстың да мерейін үстем етіп келеді.
ҚР ІІМ Спартакиадасы аясындағы бұл чемпионат полиция қызметкерлерінің спорттық шеберлігін шыңдап қана қоймай, олардың бірлігін нығайтып, кәсіби рухын көтерген маңызды шара ретінде есте қалды.
Алмас ҚАБДОЛ
