Атыраудағы драма театрдағы өртті сөндіруге 88 адам, 21 техника жұмылдырылып отыр (+ФОТО)

Atr.kz/22 тамыз, 2019 жыл. Алдын ала ақпарат бойынша, Атыраудағы  Махамбет атындағы академиялық қазақ драма театрындағы өрт жапсарлас ғимараттың ток  жинақтап тұрған қорабынан басталған.

Жергілікті Төтенше жағдайлар департаментінің баспасөз-қызметінен  білгеніміздей, қазіргі уақытта оқиға орнына 88 адам, 21 техника жұмылдырылып отыр.  Олардың арасында ірі кәсіпорындар мен мекемелерден жұмылдырылған қызметкерлер де бар.

Өрт туралы ақпарат жергілікті Төтенше жағдайлар департаментіне 13.30-да түскен.

Оқиға орнына барған аtr.kz журналистері оперативті штабтың жанкешті жұмысына куә болды.  Сонымен бірге, өрт сөндіруші қызметкерге жедел жәрдем қызметінің көмек көрсеткенін де атап өткен жөн. аtr.kz -мен арадағы қысқа сұхбатта театр қызметкерлері жалынның тез жайылғанын айтты.

Атырау қаласының әкімі Әлимұхаммед Құттымұратұлы өрттің шығу себептері анықталғаннан кейін, ғимараттың толықтай қалпына келетініне сендірді.

Еске сала кетелік, драма театр ғимараты бір ай бұрын күрделі жөндеуден кейін пайдалануға берілген болатын.  

Баян ЖАНҰЗАҚОВА, Амандық АБДОЛОВ.

Фото: Ерлан АЛТЫБАЕВ.