Атыраудағы Ақкөл ауылында жаңа спорт кешені бой көтерді
Atr.kz/31 қазан, 2019 жыл. Құрманғазы ауданының Ақкөл ауылдық округінде жаңадан бой көтерген заманауи үлгідегі спорт кешенінің ашылу салтанаты өтті.
Тұрғындар мен спортшылар алдында алғашқы құттықтау сөз сөйлеген Құрманғазы аудан әкімі Қайрат Нұртаев:
— Елімізде әлеуметтік жағдай түзелген сайын дене шынықтыру мен спорттың осындай ғимараттарының салынуы жастардың салауатты өмір салтын ұстануына кең мүмкіндік туғызуда. Мынау соның нәтижесі. Бұл игі шаралар Елбасы Нұрсұлтан Назарбаев пен Мемлекет басшысы Қасым-Жомарт Тоқаевтың тапсырмаларына сәйкес облыс әкімі Нұрлан Ноғаевтың қолдауымен жүзеге асуда. Аумағы 756 шаршы метрді құрайтын нысанның құрылысына облыстық бюджет есебінен 210 млн. теңге қаржы жұмсалды.
Балаларымыз білімнен, спорттан болсын ешбір елдің ұландарынан кем түспеуі қажет. Сондықтан, жастар мынау сәнді ғимараттың игілігін көріп, бұл жерден жақсы спортшылар өсіп шықсын, — деген ізгі тілегін білдірді.
Облыстық дене шынықтыру және спорт басқармасының басшысы Ринат Ибрагимов, Ақкөл ауылдық округінің әкімі Бисенбай Рамазанов, нысанның құрылысын жүргізген мердігер мекеме «Горизонт-С» ЖШС директоры Серік Құрманәлиев жүрекжарды лебіздерін ортаға салды. Спортты өмір бойы жанына серік еткен жасы 90-ды алқымдаған еңбек ардагері Жігер Досполаев әлі күнге жүгірістен қалмайтынын жеткізіп, жастарды салауатты өмір салтын ұстануға шақырып, ақ батасын берді.
Жаңа нысан алдындағы керілген лентаны аудан әкімі Қайрат Талапұлы, облыстық дене шынықтыру және спорт басқармасының басшысы Ринат Ибрагимов, ауыл ардагері Әбубәкар Юсупов қиды. Қос қабатты ғимарат 3 жаттығу залынан тұрады. Жаңа үлгідегі спорттық құрал-жабдықтарымен көз тартады. Сыртта футбол алаңы да бар. Ашылу салтанатынан соң, спорт кешенінде волейболдан аудандық жарыстың алғашқы ойыны да басталып кетті.
Дереккөз: «Atyrau Sport»
