Атырауда жанармай бекетінде көлік өртенді
Бүгін, 7 қаңтар күні, сағат 10:20 шамасында Атырау қаласы полиция басқармасының патрульдік полиция батальоны қызметкері Данияр Жәрдемғали түнгі ауысымнан кейін үйіне қайтып бара жатып, қаладағы жанар-жағармай бекетінде өртеніп жатқан Nissan автокөлігін байқайды.
Дереу әрекет еткен полицей өртті жедел сөндіріп, көлікті қауіпсіз жерге итеріп апарған. Сонымен қатар, ол өрт сөндіру құралын пайдаланып, оттың жанармай бекетіне таралуының алдын алған. Бұл туралы облыстық полиция департаментінің баспасөз қызметі хабарлады.
“Полиция қызметкерінің шұғыл әрекетінің арқасында өрт сөндірушілер келгенге дейін жалын тез арада сөндірілді. Оқиға орнында зардап шеккендер жоқ,” — деп мәлімдеді департаменттің баспасөз қызметінің жетекшісі Мейірім Ердәулет.
Кейін әлеуметтік желілерде автокөлік иесінің полицейге алғыс білдірген видеосы тарап, қоғамның ризашылығына ие болды.
Алтыншаш ҚҰРМАШЕВА
