Атырауда жаңа мешіт ашылды

Қазақстан мұсылмандары діни басқармасының төрағасы Наурызбай қажы Тағанұлы Атырау облысына барған сапарында Алмалы ауылында жаңа мешіттің ашылуына қатысты.

Жамағатты жаңа мешіттің ашылуымен құттықтаған Бас мүфти: «Аллаға шүкір, еліміз егемендік алған сәттен бастап дін саласында көптеген оң өзгерістер орын алды. Соның бірі – халықтың мешіттерге деген ықыласының артуы. Қазір Қазақстан бойынша 2700-ден астам мешіт халыққа қызмет көрсетуде. Жаңа мешіттердің бой көтеруі – халқымыздың дінге бет бұрғанының, рухани ізденістің артқанының айқын көрінісі.

Бұл мешіт – сол ізгі жолдың жалғасы. Мұнда намаз оқылып, Құран оқытылады, имандылық дәрістері өтеді, жастар тәрбиеленеді. Мешіт – Жаратушыға жақындайтын, мейірім мен махаббат орнайтын, ақиқат пен әділетке үндейтін қасиетті орын. Бұл – құлшылық мекені ғана емес, тәрбие мен тағылымның, білім мен бірліктің, береке мен ынтымақтың рухани ордасы.

Алла Елшісі (оған Алланың салауаты мен сәлемі болсын): «Кімде-кім Алланың разылығы үшін мешіт салса, Алла Тағала оған жәннаттан бір үй тұрғызып береді», – деген. Сондықтан бұл мешіттің салынуына үлес қосқан барлық азаматтарға, демеушілер мен құрылысшыларға, ұйымдастырушы ұжым мен жергілікті мешіт жанашырларына өзімнің және Қазақстан мұсылмандары діни басқармасы атынан шынайы алғысымды білдіремін. Алла разы болсын!,- деді.

Игі іс-шарада Бас мүфти мешіттің салынуына үлес қосқан азаматтарды Алғыс хатпен марапаттап, демеушілердің көмегімен кіші қажылыққа жолдама берді.