Атырауда заманауи би додасы өтіп жатыр

Атырау қаласында ұйымдастырылып жатқан іс-шараның мақсаты – заманауи би мен хип-хоп мәдениетін жастар арасында кеңінен насихаттап, олардың шығармашылық әлеуетін дамыту.

Байқауға 14 пен 35 жас аралығындағы өнерпаздар қатысуда. Дода төрт түрлі би бағытын қамтиды.

Заманауи би – классикалық немесе халықаралық би ережелеріне тәуелсіз, еркін қимыл мен дара стильге құрылған өнер түрі. Ол еркіндік пен заманауи бағытты айқын паш етеді.

Сайысқа Ақтөбе және Орал қалаларынан кәсіби деңгейде 15–20 жылдық тәжірибесі бар білікті мамандар қазылық етіп жатыр. Байқаудың жүлде қоры – 700 000 теңге. Қатысушылар арасында іріктеу өткізіліп, үздік топтар мен орындаушылар марапатталады.

Фестиваль салауатты өмір салтын насихаттап, жастардың мәдени белсенділігін арттыруды көздейді. Ұйымдастырушылар – облыстық ішкі саясат басқармасы және «Атырау жастар таңдауы» қоғамдық бірлестігі.

Ботагөз ИСАТАЙ