
Атырауда ана мен бала өлімі мәселесі бойынша көшпелі отырыс өтеді
Мұнайлы өлкеге жұмыс сапарымен Мәжілістің Әлеуметтік-мәдени даму комитетінің депутаттары мен Мәжіліс жанындағы Қоғамдық палата мүшелері келді. Мұнда бірлескен көшпелі отырыс өтпек. Іс-шара барысында ана мен бала өлімін азайту мәселесі талқыланбақ. Көшпелі отырыс аясында депутаттар облыстық перинаталдық орталық, облыстық балалар ауруханасы, қалалық перзентхана қызметімен танысты.

-Біздің өңірге келгендегі басты мақсатымыз — мамандармен тілдесіп, олардың талап-тілектерін білу. Яғни, орталық мемлекеттік органдарға жеткізетін өзекті мәселелерді тыңдау үшін келдік. Перинаталдық орталықта болған кезде облысқа жаңадан үлкен перинаталдық орталықтың қажеттігі атап айтылды. Әрине, қазір ЖСҚ жасақталып жатыр деген мәлімет берілді. Дегенмен, оның қаншалықты жедел жүзеге асуы да үлкен мәселе. Сондықтан, ең алдымен ана мен баланың денсаулығы басты басымдық болуы тиіс. Екінші облыстық балалар ауруханасына келдік. Мұнда да өңірде жұмыс істеп тұрған жалғыз орталық аурухана болғаннан кейін қалалық балалар ауруханасының қажеттілігін білдік. Ақиқатын айту керек, стандартқа сәйкес Атырау қаласының ауқымын ескеретін болсақ, қалалық балалар ауруханасын салу керек. Ол да жоспардың еншісінде екен. Бұл мәселе де біздің жанымызға аяздай батып тұрған проблема. Сондай-ақ үлкен ауруханаға кардиолог дәрігер қажет екенін байқадық,-дейді Мәжіліс депутаты Нартай Сәрсенғалиев.



Айбөпе САБЫРОВА
Суреттерді түсірген Ерлан АЛТЫБАЕВ