Атырауда алғаш рет арбада билеуден ел чемпионаты өтті (+ФОТО)
Atr.kz/3 маусым, 2019 жыл. Атырауда алғаш рет парабиден (арбадағы би) ел біріншілі өтті.
Еліміздің түкпір-түкпірінен 26 жұп қатысып, «Атырау» дене шынықтыру кешенінде өнер көрсетті. Сөйтіп, дүйім жұрттың алдында мүмкіндіктері шеутеулі боғланымен, құлшыныстары шексіз екенін тағы бір рет дәлелдегендей болды.
Расымен де, би – қамкөңіл жандар үшін таптырмас мүмкіндік. Сол би арқылы олар көпшілік назарын өздеріне аудартып, қоғамға қажет екендіктерін, әр қадам сайын кездесетін қызықтар мен қиындықтарды барынша жеткізе алды.
Сондай-ақ, чемпионат аясында халықаралық би спорты бойынша «ЕврАзия-2019» турнирі ұйымдастырылды. Осы орайда, қос шараны да «Аэлита» би клубы өткізіп отырғанын айта кеткен жөн.
Жарыс қорытындысымен түрлі номинациялар өз жеңімпаздарын тапты. Оларға арнайы дипломдар мен естелік сыйлықтар табысталды.
— Әр түрлі өңірлерде осындай жарыс өткізу арқылы ерекшке қажеттіліктері бар адамдарды оңалтуға болады. Бұл ҚР Тұңғыш Президентінің кедергісіз орта құру туралы тапсырмасының мониторингі болып табылады. Халықаралық турнирге қатысу үшін ең жақсы параспортшылар іріктелініп алынды. Мүмкіндігі шектеулі жандарды оңалтуға көп көңіл бөлу керек. Облыстық және қалалық деңгейде спорттық биді дамыту қажет. Осындай жарысты өткізу мұнайлы астанамыздың тарихында маңызды іс-шара болатынына сенім мол. Бұл жергілікті мәдениет саласы мен спорттық бидің дамуына оң әсер етпек, — дейді ұйымдастырушылар.
Амандық САҒЫНТАЙҰЛЫ
