Атырау университеті Каспий ойындарының жеңімпазы атанды

Астраханда өткен VII Халықаралық студенттік спорттық ойындарда Х. Досмұхамедов атындағы Атырау университетінің командасы айрықша жетістіктерге қол жеткізіп, жалпыкомандалық есепте бірінші орынға ие болды.

Бұл жарыс Каспий аймағының 5 елінен қатысқан 14 жоғары оқу орнының студенттерін біріктірді. Сонымен қатар, Ресейде білім алып жатқан 9 африкалық елдің студенттері де жарысқа қатысты.

Атырау университеті футбол, баскетбол, фиджитал-баскетбол, самбо, шахмат және дойбы бойынша жоғары нәтижелер көрсетіп, әрқайсысында 100 балл жинады. Жалпы 790 ұпаймен команда Каспий ойындарының жеңімпазы атанды.

Сондай-ақ, Қазақстанның басқа университеттері де табысты өнер көрсетіп, Атырау мұнай және газ университеті 9-орынға, ал Ш.Есенов атындағы Каспий технологиялар және инжиниринг университеті 7-орынға ие болды.

Бұл ойындар Каспий маңы елдерінің студенттерін біріктіріп, спорттық және мәдени ынтымақтастықты нығайтуға зор үлес қосты.

Бұған дейін Атырау студенттерінің спорттық доданың алғашқы ойындарында жүлдеге қол жеткізгенін хабарлаған едік.