Атырау өнімі: атыраулық отбасы жылына мыңдаған тонна көкөніс өндіреді
2019 жылдан бері егін шаруашылығымен айналысып келе жатқан «Отбасы» шаруа қожалығы бүгінде Атырау халқын сапалы әрі қолжетімді көкөніспен қамтамасыз етіп отыр,-деп хабарлайды Өңірлік коммуникациялар қызметі.
Қожалыққа қарасты «Ардагер» жылыжайында жарты гектарға 11,7 мың түп қызанақ, тағы жарты гектарға 12 мың түп қияр егілген.
Дамбы тасжолының бойындағы Зарослый ауылында да 10 гектар егістік пен 1 гектар жылыжай бар. Мұнда қияр, қызанақ, баклажан, шпинат, пекин қырыққабаты, аскөк пен салат жапырақтары және өзге де көкөністер өсіріледі. Ал Махамбет ауданына қарасты Карманов ауылындағы егіс алқабында 60 гектарға сәбіз, қырыққабат, картоп және қызылша отырғызылған.
«Отбасы» шаруа қожалығы өндірген өнімдер «Dihan» брендімен қаладағы 10 дүкенге жеткізіліп, тұрғындарға тікелей қолжетімді бағамен ұсынылады.
