Атырауда суретші Әбдірашит Сыдыхановтың жеке шығармашылық көрмесі өтуде (ФОТО)

Атыраудағы Ш.Сариев атындағы көркемсурет және қолданбалы-сәндік өнер музейінде белгілі қылқалам шебері Әбдірашит Сыдыхановтың «Таусылмайтын әуен» атты жеке шығармашылық көрмесі өтуде. Ол 15 қазанға дейін жалғасады.

Әбдірашит Аронұлы – 1937 жылы 12 тамызда Индер ауданының Кулагино ауылында дүниеге келді. 1965 жылы Н.В.Гоголь атындағы көркемсурет училищесін бітірген соң, кинофилмьдердің қоюшы-суретшісі болып еңбек етті. Бүгінде суреттері Әбілхан Қастеев атындағы мемлекеттік өнер, Мәскеудегі Третьяков галереясы мен Шығыс халықтарының музейінде, Америка құрама штаттарының Зиммерли, Польшадағы Хута Катовице, Франция, Швейцария, Канада, Германия, Түркия, Израильдегі жеке мұражай қорларында сақтаулы.

Көрменің ашылу салтанатында музей басшысы Төлеген Орынбасарұлы суретшінің қызы Зәуреш Әбдірашитқызын алғыс хатпен марапаттады. Белгілі сазгер Илья Жақанов та суретші туралы естеліктерімен бөлісті. Ал, еліміздің Ресейдегі Төтенше және өкілетті елшісі Иманғали Тасмағамбетов құттықтау хатын жолдады.

Амандық САҒЫНТАЙҰЛЫ

Суреттерді түсірген Әнуар ӘБІЛҒАЗИЕВ