Атырауда мемлекеттік рәміздер күні тойланып жатыр
Атырауда Қазақстан Республикасының мемлекеттік рәміздерінің алғаш бекітілгеніне 25 жыл толуына орай мерекелік концерт ұйымдастырылды. Орталық алаңда өткен салтанатты шарада облысқа белгілі әншілер мен шығармашылық ұжымдар өнер көрсетті.
Алаңға облыс әкімі Нұрлан Ноғаев арнайы келіп, аймақ тұрғындарын мерекемен құттықтады.
«Елбасы белгілеп берген межелерге жетуде көк тудың астына бір кісідей бірігіп мемлекеттің даму бағытын қамтамасыз ету – баршамыздың парызымыз. Бұл ортақ мақсаттарға жетуіміздің негізі – елдегі тыныштық, қоғамдық келісім . Олай болса, көк туымыз әрқашан бейбіт аспанда желбіреп, әнұранымыз жүректерге жігер беріп, елтаңбамыз елдігімізді айғақтап халқымыздың мәртебесі өсе берсін!», – деді ол.
Айта кетелік, 1992 жылғы маусымның 4-інде тәуелсіз Қазақстанның мемлекеттік рәміздері алғаш бекітілді. 2007 жылғы 4 маусымда «Қазақстан Республикасының Мемлекеттік рәміздері туралы» Конституциялық Заңы қабылданды. Осы Заңға сәйкес жыл сайын 4 маусым Қазақстан Республикасында Мемлекеттік рәміздер күні ретінде мерекеленеді.
