Ана – тіршілік тірегі

Кеше Халықаралық отбасы күніне арналған мерекелік іс-шараны «Жарқын жанұя» қоғамдық бірлестігі ұйымдастырды. «Kuralay» өнер студиясында өткен «Ана – тіршілік тірегі» атты мерекелік диве қатысушыларды бір серпілтті.

Іс-шараға «Алтын алқа» және «Күміс алқа» иелері, көпбалалы аналар мен ерекше бала тәрбиелеп отырған аналар қатысты. Мерекелік кездесуге Атырау облысы әкімі жанындағы әйелдер істері және отбасылық-демографиялық саясат жөніндегі бас инспектор Зәмзагүл Жалмурзина арнайы қатысып, аналарды мерекемен құттықтады.
– Отбасы – қоғамның өзегі. Ана – мейірім мен парасаттың, береке мен бірліктің бастауы. Мұндай шаралар арқылы біз отбасылық құндылықтарды дәріптеп, аналардың еңбегін құрметтеуге жол ашамыз, — деді З.Жалмурзина.
«Жарқын жанұя» қоғамдық бірлестігінің жетекшісі Динара Құдайбергенова да сөз сөйлеп, шараның мақсаты – аналарды қолдау, олардың қоғамдағы рөлін насихаттау екенін атап өтті.

Қатысушылар арт-терапияда сурет салып, студияның жас өнерпаздары күй орындап, көрермен ықыласына бөленді.
Бағдарлама соңында аналарға сыйлықтар табысталып, жиналғандар ұйымдастырушыларға ризашылықтарын білдірді.

Майра ЕРҒАЛИ