Жас балуандар Ұлы Отан соғысы батырының рухына тағзым етті
Атырау облысы полиция департаментінің ұйымдастыруымен еркін күрестен өткен турнир Ұлы Отан соғысының және Ішкі істер министрлігінің ардагері Қабдыраш Бігамбаевтың құрметіне арналды, — деп хабарлайды AtyrauPress тілшісі.
Атырау қаласында қолға алынған XIII республикалық турнирде 200-ге жуық жас спортшы бозкілемде бақ сынады. Турнир тек спорттық дода ғана емес, патриоттық тәрбиенің алаңына айналды. Салтанатты шарада қатысушыларға соғыс жылдарындағы ерліктің маңызы мен бейбіт заманда Отанға қызмет еткен азаматтардың үлгісі жайлы айтылды.
Атырау облысы полиция департаментінің бастығы Нұрхат Оразбаев естелікті сақтау маңызды екенін атап өтті:
— Жеңіс күні — бұл ерлік, рухтың мықтылығы мен парызға адалдықтың символы. Қабдыраш Бігамбаев осы қасиеттердің жарқын үлгісі: ол майданда Отанын қорғады, кейін ішкі істер органдарында ондаған жыл қызмет етті. Бүгінгі кілемде болашақ чемпиондар ғана емес, елдің болашақ қорғаушылары күресіп жатыр деп сенемін, — деді ол.
Турнир жеңімпаздары мен жүлдегерлері медальдармен және естелік сыйлықтармен марапатталды. Ардагердің өмір жолына ерекше назар аударылды. Қабдыраш Бігамбаев 1944 жылы әскер қатарына шақырылып, 13-атқыштар дивизиясының құрамында соғысқан. Жеңістен кейін туған еліне оралып, полицияда қызмет етті. Ол 12 жыл бойы облыстық фельдъегерлік қызмет бөлімін басқарған.
