Оңайбай Көшековтің 100 жылдығына арналған спартакиада өтті
Қоғам және мемлекет қайраткері, Атырау облысының Құрметті азаматы, Ұлы Отан соғысының ардагері Оңайбай Көшековтің 100 жылдығына арналған спартакиада өтті. О.Көшеков атындағы Атырау аграрлы-техникалық колледжінде ұйымдастырылған іс-шара оқытушылардың белсенділігін көрсетуге мүмкіндік берді.
Спартакиада барысында оқытушылар спорттың он түрі бойынша күш сынасты. Бұл тек спорттық бәсеке ғана емес, сонымен қатар ұжымдық рухты, достықты және ынтымақтастықты нығайтуға арналған алаң болды.
–Оңайбай Көшековтің 100 жылдығы біз үшін тек мерейтой емес, оның өнегелі өмірін ұлықтаудың, жастар арасында спортқа деген қызығушылықты арттырып, саламатты өмір салтына шақырудың бірегей мүмкіндігі. Біздің оқытушыларымыздың белсенді қатысуы колледждің мықты командалық рухын көрсетеді. Біз спортты ғана емес, сонымен қатар халықаралық стандарттарға сай білім мен тәрбие беруді де мақсат етеміз. Спорт – өмір салты, ал Оңайбай Көшековтың өмірі – үлгі мектебі» — деп атап өтті колледж директоры Ислам Джанзаков.
Спартакиада қорытындысы бойынша жеңімпаздар марапатталып, әр команданың қатысушыларына естелік сыйлықтар табысталды. Жүлделі І орынды колледждің Аддивті-технологиялық бөлімі жеңіп алса, ІІ, ІІІ орындарды Электрлі-механикалық және Аграрлық бөлімдер иеленді. Техникалық пайдалану бөлімі ынталандыру сыйлығымен марапатталды.
Аталған іс-шара қоғамда спорттың, салауатты өмір салтының насихатталуына және О.Көшековтің өнегелі өмірі мен еңбегінің бағалануына жаңа серпін берді.
