Атырауда кіші аяқ добынан турнир өтті

Атырау қаласының «Каспий» құрама командасының құрметті мүшесі, құрметті ұстаз, білікті бапкер және үздік қақпашы Сабыржан Қалиевті еске алуға арналған ардагерлер арасындағы кіші аяқ добынан турнир ұйымдастырылды.

— Бұл шара қаламыздың спорттық тарихындағы маңызды оқиға ретінде есте қалары анық.
Сабыржан Қазанқапұлы бала күнінен футболға құмартып өскені сонша, 9 сынып оқып жүргенінде команда құрамына өтті. Ол кезде қақпашылар аз болатын. Қазақстан құрамасына да шақыртты. Мықты, кәсіби қақпашы долды десем артық айтпаспын, — дейді бапкері.

Турнирге «Мелиоратор», “Каспий ардагерлері», «Балыкшинец» және «Достар»командалары қатысып, жақсы ойын көрсетіп, күш сынасты. Барлық қатысушылар Сабыржан Қалиевтің спорттағы жетістіктерін және оның ұрпаққа қалдырған мұрасын еске ала отырып, жақсы нәтиже көрсетуге тырысты.
Сабыржан Қалиев – тек өз кезіндегі үздік ойыншы, қақпашы ғана емес, сонымен қатар болашақ спортшыларды тәрбиелеген білікті бапкер. Оның спорттағы жетістіктері мен адамгершілік қасиеттері көпшіліктің көңілінде мәңгілік орын алды. Бұл турнирде қатысушылар оның есімін құрметтеп, әділ ойын мен спортқа деген адалдықты көрсетті.

Турнирдің ұйымдастырылуы мен өтуі де жоғары деңгейде болды. Бұл шара спорттың ардагерлерінің арасындағы достықты нығайтып, қаладағы кіші аяқ допты дамытуға да үлкен үлес қосты.
Жарыс қорытындысы бойынша “Каспий жастары” І орын, “Милеротор” командасы ІІ орынды иеленді. Ал Сабыржан Қазанқапұлының құрдастарынан құралған командаға ІІІ орын бұйырды.
Турнир жеңімпаздарына кубок табысталып, арнайы дипломмен марапатталды.

-Сабыржан Қалиевті еске алу турнирі – оның өмір жолы мен жетістіктерін жастарға үлгі ету мақсатында маңызды іс-шара болды. Спорттың ардагерлері мен жанкүйерлері үшін бұл турнир жай ғана жарыс емес, Сабыржан Қалиевтің есімін қайтадан еске алып, оның жолын жалғастыруға деген құрметтің белгісі, — дейді інісі Жеңіс Қазанқапұлы.

Рита ӨТЕУҒАЛИ

Суреттерді түсірген Ерлан АЛТЫБАЕВ