Әділет орнаған елде жеңіс те әділ болады
Мемлекет басшысы Қасым-Жомарт Тоқаев Конституцияның 30 жылдығына арналған мәлімдемесінде еліміздің құқықтық жүйесі мен мемлекеттік құрылымына елеулі өзгерістер енгізген 2022 жылғы конституциялық реформаның маңызын жан-жақты атап өтті. Президентіміз бұл реформаның ел тарихындағы ең ауқымды әрі мазмұнды өзгерістердің бірі екенін нақты дәлелдермен көрсетті.
Мен кәсіби спортшы ретінде бұл сөздерге толық қосыламын. Себебі кез келген жетістік, оның ішінде спорттағы жеңіс те, елдегі тұрақтылық пен әділдікке тікелей байланысты. Егер қоғамда әділет орнаса, мүмкіндіктер тең болса, жастар өз болашағына сенсе – онда ел де, спорт та дамиды. Сондықтан Ата Заңға енгізілген Әділдік, Ашықтық, Есептілік, Жауапкершілік қағидаттарының бекітілуі – нағыз тарихи шешім деп санаймын.
Президентіміздің «Біз Конституцияның негізгі мән-мазмұнын сақтай отырып, жаңа саяси жағдайға сай келмейтін нормаларды жойдық. Бұл – қоғам күткен әділеттілікке жасалған маңызды қадам» деген сөзі мен үшін, қарапайым азамат ретінде де, ел намысын қорғап жүрген спортшы ретінде де үлкен мәнге ие.
2022 жылғы референдум арқылы халық ел болашағына өз үнін қосты. Бұл – біздің демократиялық, әділетті мемлекетке айналып келе жатқанымыздың айғағы. Ең бастысы – Конституцияға енгізілген өзгерістердің барлығы халықтың мүддесіне сай жасалды. Бұл – Елбасы бастаған мемлекетшіл дәстүрдің Президент Қасым-Жомарт Тоқаев кезеңінде жаңа мазмұнмен жалғасып жатқанын білдіреді.
Біз, спортшылар, әрдайым әділ жарысты, таза бәсекені қолдаймыз. Сол сияқты еліміздің де дамуы тек әділет пен тазалыққа негізделуі керек. Ал жаңарған Конституция – осы жолдағы берік іргетас.
Біздің спорттағы әр қадамымыз – елдің ертеңі үшін, әр жеңіс Тәуелсіз Қазақстанның мерейі үшін алға қойылған басты мақсат.
Біз – Ата Заңына адал, әділетті Қазақстанды бірге құрып жатқан мызғымас елміз.
Хайдар ЕСЕНҒАЛИЕВ,
Атырау облысының “Динамо” ДШСҚ, ҚБ филиалы төрағасының бірінші орынбасары, қоян-қолтық ұрыстан Халықаралық спорт шебері, Халықаралық төреші, Қазақстанның Құрметті спорт қызметкері
