Жаңа айдар: “Сіз білесіз бе?” – қызықты деректер әлемі
Аtr.kz сайты жаңа “Сіз білесіз бе?” айдарын қолға алды. Бұл айдар аясында оқырмандар көпшілік біле бермейтін қызықты ақпараттармен таныса алады. Тарихи деректер, ғылыми жаңалықтар, тұрмыстық лайфхактар мен танымдық мәліметтер – барлығы осы айдарда ұсынылады.
Қоғамға пайдалы әрі танымдық ақпарат таратуға бағытталған жаңа жоба оқырмандардың ой-өрісін кеңейтіп, күнделікті өмірде пайдалы болатын деректерді ұсынуды көздейді.
Ендеше, алғашқы шығарылымдағы қызықты деректерді оқи отырыңыз!
Көне заманның құпиясы: Өрт сөндірушілерге мұрт не үшін қажет болды?
Өрт – адамзаттың ежелден келе жатқан қаупі. Қазіргі заманда өрт сөндірушілер заманауи құралдармен, арнайы киімдермен және қорғаныс құралдарымен толық қамтамасыз етілген. Алайда көне замандағы өрт сөндірушілер үшін қауіп-қатермен күресудің өзіндік әдістері болған. Олардың бірі – сәнді мұрт қою.
Мұрт – табиғи респиратор
Төтенше жағдайлар министрлігінің ресми ақпараттық арнасында жарияланған мәліметтерге сәйкес, бұрынғы өрт сөндірушілерге арнайы жарғы бойынша сақал мен мұрт қою міндеттелген. Бұл талаптың астарында сәннен гөрі, тәжірибелік маңыз жатқан.
Өрт кезінде ауаға көміртегі тотығы мен басқа да зиянды жану өнімдері тарайды. Сол заманның өрт сөндірушілері үшін негізгі қорғаныс құралы – суланған мұрт болды. Олар өртке кірер алдында мұрттарын сулап, оны ауыз бен мұрынды жауып тұратындай етіп қолданған. Ылғал мұрт күйік газдарының түсуін біршама бәсеңдетіп, тыныс алу жолдарын зиянды түтіннен қорғауға көмектескен.
Бұл қарапайым, бірақ өте тиімді тәсіл заманауи газқағарлар пайда болғанға дейін кеңінен қолданылған. Өрт сөндірушілердің мұртына қойылған талаптың бір себебі де осы – қауіпсіздік шараларын барынша арттыру.
Уақыт өте келе өзгерген талаптар
Ғасырлар бойы өрт сөндірушілер түрлі өзгерісті бастан кешірді. Бүгінде олар арнайы тыныс алу аппараттарымен және жоғары сапалы қорғаныс құралдарымен жабдықталған. Дегенмен көне дәуірдің мұндай әдістері – адамзаттың тапқырлығы мен бейімделу қабілетінің айқын көрінісі.
Осындай қызықты деректер өрт сөндіру тарихының ерекшеліктерге толы екендігін және батыл өрт сөндірушілердің өмірін қорғау үшін түрлі тәсілдер қолданылғанын көрсетеді.
Дайындаған: Алтыншаш ҚҰРМАШЕВА