Жаңарған Қазақстанның құқықтық тұғыры

Мемлекет басшысы Қасым-Жомарт Тоқаевтың Конституция күніне арналған мәлімдемесі – елімізде жүргізіліп жатқан ауқымды реформаларға саяси-идеялық серпін беретін, болашақ даму жолымызды нақты айқындайтын маңызды үндеу.

Президенттің сөзінде еліміздің саяси жүйесінде орын алған нақты өзгерістер мен жетістіктер кеңінен қамтылды. Конституциялық реформаның арқасында еліміз түбегейлі жаңғырудың жаңа кезеңіне аяқ басты. Бұл – халық пен билік арасындағы сенімді күшейтуге, азаматтардың шешім қабылдау үдерісіне тікелей қатысуына жол ашқан тарихи бетбұрыс.

Парламенттің рөлінің артуы, Үкіметтің жауапкершілігінің күшеюі, орталық пен жергілікті атқарушы органдар арасындағы өкілеттіктердің әділ бөлінуі – биліктің ашықтығы мен тиімділігін арттырып отыр. Бұған қоса, аралас сайлау жүйесі мен бір мандатты округтер арқылы сайланған мәслихат депутаттары, тәуелсіз кандидаттардың көбеюі – еліміздегі саяси плюрализмнің айғағы.

Президентіміздің: «Билікке жаңа буын өкілдері келіп жатыр», – деген сөзі – елге жаңа серпін мен жаңа көзқарас қажет екенін дәлелдейді. Шынында да, соңғы жылдары елдің саяси алаңына түрлі салада тәжірибесі бар, тың идея ұсынуға қабілетті азаматтар келіп қосылды. Бұл – саяси жаңғырудың өміршең әрі ұзақмерзімді болуына негіз.

Ауыл әкімдерін тікелей сайлау – демократиялық реформалардың нақты нәтижесі. Енді аудан және облыстық маңызы бар қала әкімдерін де халық өзі сайлайтын болады. Бұл – еліміздің мемлекеттік басқару жүйесін түбегейлі жаңартатын, азаматтардың өз тағдырына өзі жауапкершілікпен қарайтын жаңа кезеңнің бастауы. Президент айтқандай, бұл тәжірибе Орталық Азияда алғаш рет жүзеге асып отыр.

«Халық үніне құлақ асатын мемлекет» тұжырымдамасының жүйелі түрде енгізілуі – мемлекет пен қоғам арасындағы кері байланыстың нығайғанын көрсетеді. Қазір азаматтар елдің қоғамдық-саяси өміріне бұрынғыдан белсендірек араласуда, бұл – демократияға бет алған ел үшін үлкен жетістік.

Мен Мемлекет басшысының бұл бастамаларына толық қолдау білдіремін. Елде қабылданып жатқан заңдар мен бастамалар халықтың өмір сапасын арттыруға, әділетті қоғам құруға бағытталған. Әрбір заңнамалық шешім – ел ертеңіне жауапты қадам.

Ата Заң – біздің құндылықтарымыздың, бірлігіміз бен тәуелсіздігіміздің символы. Ал конституциялық реформа – сол құндылықтарды заман талабына сай бейімдеу. Біз осы тарихи мүмкіндікті ел болашағы үшін тиімді пайдалануымыз керек.

Айгүл ӘДІЛОВА,

Зинеден ауылдық округінің әкімі

Исатай ауданы