Бауырлас халықтардың байланысы жаңа деңгейде
Қазақстан Президенті Қасым-Жомарт Тоқаевтың Қырғызстанға жасаған бұл ресми сапары — тек дипломатиялық қатынастың көрінісі ғана емес, сонымен қатар екі ел арасындағы тарихи, мәдени және стратегиялық байланысты жаңа деңгейге көтеретін бастама.
Президент Тоқаевтың сөзінен ұғынарымыз — қазақ-қырғыз қатынасы тек экономикалық әріптестікпен шектелмейді. Бұл — бір-біріне рухани, мәдени, тарихи тұрғыдан жақын халықтардың ортақ мұрат жолындағы ынтымағы. «Қасиетті Алатаудың қос қыраны» деп сипаттауы — қос мемлекеттің өзара тәуелділігін әрі туыстығын тереңінен ұғынғанының дәлелі.
Екіжақты сауда-саттықтың 2 миллиард долларға жуықтауы, инвестициялық жобалардың артуы, су-энергетика саласындағы үйлесімді әрекет — мұның бәрі нақты экономикалық ықпалдастықтың көрсеткіші. Сонымен бірге мәдени-гуманитарлық саладағы байланыстардың нығаюы — халықтар арасындағы шынайы жақындасудың көрінісі.
2023 жылы қол қойылған Одақтастық қатынастарды кеңейту туралы тарихи шарт пен осы жолғы Ынтымақтастықтың кешенді жоспары — бұл байланыстарды жүйелі әрі ұзақмерзімді дамытуға бағытталған құжаттар. Бұл – уақыт сынынан өткен бауырлас елдердің болашаққа бірге ұмтылуға дайын екенін көрсетеді.
Саяси диалогтың жоғары деңгейде қалыптасуы — тек екіжақты қарым-қатынасты емес, бүкіл Орталық Азиядағы тұрақтылық пен дамуға оң әсер ететін фактор.
Абдолла ИДРЕСОВ,
«AMANAT» партиясы Атырау облыстық филиалының төрағасы
