«AMANAT» партиясының жанындағы Сыбайлас жемқорлыққа қарсы іс-қимыл жөніндегі Республикалық кеңес мүшелері Атырау облысына арнайы іссапармен келіп, «Ұлттық индустриялық мұнай-химия технопаркі» арнайы экономикалық аймағында «Kazakhstan Petrochemical Industires Inc.» ЖШС және «Karabatan utility solutions» ЖШС-нің жұмысымен танысты.
Қоғамда үлкен резонанс тудырған «Karabatan utility solutions» ЖШС-нің ағынды суы ашық алаңға жайылуы мәселесі бойынша ҚР Парламент Мәжілісінің және Атырау облыстық мәслихатының депутаттары, партия жанындағы экологиялық кеңес мүшелері өндіріс ошағына барып, мамандармен жүздесіп, мән-жайды көзбен көріп келді.
– Атырау облысы мәслихат депутаттарының шақыруымен осы мәселеге орай арнайы келіп, ағынды су алаңын көрдік және мамандардың уәжін, пікір-ұсынысын тыңдадық. Енді парламентте қажеттілігіне қарай экологиялық нормаларға белгілі бір өзгерістер енгізуге ұсыныс беруге дайынбыз, – деді ҚР Парламент Мәжілісінің депутаты Ерлан Саиров.
«AMANAT» партиясы аталған су алаңын жою мәселесі бойынша жұмыстарды жалғастыра береді және барлық іс-шаралар партияның бақылауында болады.
Н. Насыр
