Жарнама
Құқық

Қарулы Күштер тылы: Мерейді өсірген марапат

Атырау қаласында Қарулы Күштер тылының құрылғанына 33 жыл толуына орай салтанатты шара өтті. 1992 жылы 28 тамызда құрылған Қарулы Күштердің тылы бүгінгі күнге дейін еліміздің қорғаныс қабілетін нығайтуға зор үлес қосып, әскердің оқу және жауынгерлік өмірін қамтамасыз етуде маңызды рөл атқарып келеді.

f472bc20 2f5f 4523 aa1f cdfc582b0d9f

Шара барысында сөз алған «Батыс» өңірлік қолбасшылығының қолбасшысы, генерал-майор Бауыржан Артықов әскери қызметшілерді кәсіби мерекемен құттықтап, тыл мамандарына өздерінің жоғары жауапкершілігі, кәсібилігі және әскери борышына деген адалдығы үшін алғыс айтты.

– Қарулы Күштердің тыл мамандары өздерінің күнделікті қажырлы да жанқиярлық еңбектері арқылы ең күрделі міндеттерді орындауға қабілетті жаңа тылдық қамтамасыз ету жүйесін қалыптастырып, бүгінгі таңда еліміздің әскерін материалдық ресурстармен толық әрі уақытылы қамтамасыз етуде жоғары нәтижелерге қол жеткізді, — деді генерал-майор Бауыржан Артықов.

Салтанатты жиында тыл қызметінің бір топ офицерлері марапатталды. Олардың қатарында подполковник Нұрдаулет Нұрмағамбетов, подполковник Ғабит Наурызбаев, капитан Нұрсұлтан Базарбай және лейтенант Мағжан Төлеген сынды әскери қызметшілер болды.

Мерекелік шараға қатысқан тыл ардагері, полковник Сағидолла Рысқалиев тыл қызметінің тарихи маңызы мен бүгінгі таңда атқаратын рөлі туралы ойларымен бөлісті.

– Әрбір сарбаздың таңғы асынан бастап, үстіндегі киіміне дейін, қажетті барлық заттарын уақытында және сапалы түрде қамтамасыз ету біздің басты міндетіміз болды. Қарулы Күштердің тылы – армияның сенімді тірегі. Бүгінде тыл мамандары осы жауапкершілікті абыроймен атқарып, әскердің барлық қажеттіліктерін қамтамасыз ету бойынша өздеріне жүктелген міндетті толық орындап келеді. Бұл ұрпақтар сабақтастығының жемісі, әрбір буын өзінің міндетін адалдықпен атқаруда, — деп атап өтті Сағидолла Рысқалиев.

Қарулы Күштер тылының құрылуының 33 жылдығына арналған бұл салтанатты шара әскерилердің қажырлы еңбегін бағалауға, олардың қызметіне құрмет көрсетуге арналған маңызды кезең болып табылады. Тыл мамандарының адал еңбегі мен табандылығы арқасында Қазақстан армиясы еліміздің қауіпсіздігін қамтамасыз ету жолында үлкен жетістіктерге жетті.

Майра ЕРҒАЛИ

Суреттерді түсірген Әнуар ӘБІЛҒАЗИЕВ

Related Articles

Добавить комментарий

Ваш адрес email не будет опубликован. Обязательные поля помечены *

Back to top button