Полиция мен қоғам арасындағы алтын көпір
Бұқаралық ақпарат қызметкерлері күні аясында полиция департаментінде сала өкілдеріне арналған салтанатты кездесу өтті.
Кездесуде Атырау облысы бойынша полиция департаментінің бастығы, генерал-майор Нұрхат Оразбаев өңірлік БАҚ өкілдерін кәсіби мерекемен құттықтап, қоғаммен байланыс орнатудағы еңбектеріне алғыс білдірді.
– Қазіргі қоғамда шынайы ақпаратқа деген сұраныс зор. Сіздер осы сұранысқа жауап беріп, ел ішіндегі тыныштық пен тәртіпке қатысты деректерді дер кезінде әрі нақты жеткізіп келесіздер. Бұқаралық ақпарат құралдары – қоғам мен полиция арасындағы дәнекер ғана емес, қоғамдық пікір мен көзқарасты қалыптастырушы күш. Бұл – полиция қызметінің ашықтығы мен халық сенімін арттыру жолындағы ортақ іс, — деді Нұрхат Кенжебайұлы.
Салтанатты басқосуда Ақпараттық саясат бөлімінің басшысы, полиция лейтенанты Мейірім Ердәулет сөз алып, бұқаралық ақпарат құралдарымен бірлесіп атқарылып жатқан жұмыс бағыттарына тоқталды.
– Журналист – тек жаңалық жеткізуші емес, қоғамның көзқарасын қалыптастыратын қуатты күш. Осы жолда біз бірлесе әрекет етеміз. Ішкі істер органдарының қызметін халыққа ашық әрі әділ көрсетуде сіздердің рөлдеріңіз орасан, — деді Мейірім Ердәулет.
Кездесу барысында бірқатар журналистке полиция департаменті атынан Алғыс хаттар табысталды. Бұл – қаламмен қызмет еткен еңбектің еленгені, құқық қорғау органдары мен ақпарат құралдарының өзара сенімінің көрінісі.
Нұрайби БАЙНҰР
