Браконьерлер заңды белден басып тұр
«Бекіре-2025» кең көлемді балық қорғау акциясы басталғалы бергі айдан астам уақытта «Жайық-Каспий» облысаралық балық шаруашылығы инспекциясының инспекторлары балық қорғау, құқық қорғау органдары және Қазақстан Республикасы ҰҚК Шекара қызметімен бірлесіп, табиғат қорғау заңнамасын бұзудың 702 дерегін анықтады.
— Осы кезеңде 539 адам әкімшілік жауапкершілікке тартылды. Бұдан бөлек, браконьерлікпен және сирек кездесетін, жоғалып кету қаупі төнген балық түрлерінің заңсыз айналымына байланысты кінәлі деп танылғандарға қатысты 21 қылмыстық іс қозғалды. Оларға жалпы сомасы 12,8 млн. теңге көлемінде айыппұл салынды. Есепті мерзімде заңсыз айналымдағы 2,9 тоннадан астам “су маржаны” (соның ішінде 584 келісі — бекіре тұқымдас бағалы балық, 2 келіден астам — қара уылдырық), 124 балық аулау құралы және 29 су көлігі тәркіленді. Одан бөлек, өзен сағалары мен теңіз акваториясында күнделікті тексеру шараларын жүргізу нәтижесінде қосымша 450 заңсыз қолданылған балық аулау құралы браконьерлерден тәркіленді. Акция мамыр айының соңына дейін жалғасады, — деді инспекцияның ресми өкілі Олег Тушканов.
Қабылданып жатқан шараларға, жүргізілген жұмыстарға қарамастан, браконьерлердің әлі де болса тәртіп пен талапқа бағынбай, заңды белден басып жүргені байқалады.
Дәулетқали АРУЕВ
