«Бекіре-2024»: жедел алдын алу іс-шарасының күзгі кезеңі басталды

Өткен сейсенбі күні Атырауда «Жайық-Каспий» бассейні аумағында жыл сайынғы «Бекіре-2024» жедел-алдын алу іс-шарасының күзгі кезеңі басталды.

Осы жылдың 31 қазанына дейін жалғасатын жұмыс аясында мобильді топтар құрылып, автожолдарда, вокзалдарда, станцияларда, жолаушылар пойыздары маршруттарында, базарларда бақылау күшейтілуде.

–Бұл іс-шаралар балық және балық өнімдерін заңсыз өндіру, тасымалдау, сатып алу, өткізу және сату фактілерін анықтау және болдырмау мақсатында жүргізіледі. Осыған байланысты, жедел алдын алу жұмыстарын жүргізу кезінде тұрғындардан құқық қорғау органдары қызметкерлерінің заңды талаптарына аса түсіністікпен қарауларын сұраймыз, — дейді облыстық полиция департаменті баспасөз қызметінің жетекшісі Мейірім Ердәулет.

Қ.ШӘКІРОВ

Сурет: gov.kz