Бала қауіпсіздігі – басты талап
Елімізде барлық балабақша мен мектепте және колледждерде балалардың қауіпсіздігін қамтамасыз етуге бағытталған республикалық ақпараттық іс-шара өтіп жатыр. Наурыздың 20-сында басталған бұл жұмыс 23 мамырға дейін жалғасады.
Республика Оқу-ағарту министрлігі Ақпараттық қамтамасыз ету департаментінің бас сарапшысы Эльмира Тұңғатарованың хабарлауынша, қауіпсіздік шараларын күшейту және балалардың жарақаттануының алдын алу мақсатында ата-аналар жиналысының бірыңғай күнін өткізу туралы жергілікті атқарушы мекемелерге тиісті хаттар жолданған. Ата-аналармен кездесудің негізгі тақырыбы – су айдындарындағы қауіпсіздік ережелері мен балалардың терезеден құлау жағдайларының алдын алу мәселелері.
Жиналыс барысында ата-аналарға арнайы жадынамалар мен әдістемелік ұсынымдар беріледі. Сонымен қатар, балалардың жарақат алуына әкелетін негізгі себептер – ересектер тарапынан бақылаудың жеткіліксіздігі, рұқсат етілмеген орындарда шомылу және қауіпсіздік шараларының сақталмауы жан-жақты талқыланады. Осыған байланысты балалардың үйде, мектепте және көшеде қауіпсіздігін қамтамасыз етуге бағытталған алдын алу шаралары ұсынылады.
Профилактикалық жұмыстар еңбек ұжымдары деңгейінде де ұйымдастырылып, оған педагогтер, білім беру мекемелерінің өкілдері, жергілікті атқарушы органдар мен балалардың құқықтарын қорғау саласындағы сарапшылар қатысады.
–Көктемгі жылы күндермен бірге балалардың белсенділігі де артады. Өкінішке қарай, осы кезеңде түрлі жазатайым оқиғалар жиілеп кетеді. Балалардың қауіпсіздігі – біздің ортақ міндетіміз. Барлық ата-ананы сақтық шараларын күшейтуге, балаларға қауіпсіздік ережелерін түсіндіруге және оларды қараусыз қалдырмауға шақырамын, — дейді аталған министрліктің Балалардың құқықтарын қорғау комитетінің төрайымы Насымжан Оспанова.
Іс-шара аясында «Қауіпсіз терезе» акциясы да өткізіледі. Оның басты мақсаты – ата-аналар мен қоғамның назарын үйдегі қауіпсіздік мәселелеріне аударып, алдын алу шаралары туралы ақпарат беру.
Айта кетейік, өткен жылы заңнамаға енгізілген өзгерістерге сәйкес, барлық құрылыс компаниялары жаңа көпқабатты тұрғын үйлерде терезелерге қорғаныш құлыптарын орнатуға міндеттелді. Бұл талап былтырдан бастап пайдалануға берілген барлық тұрғын үйге қолданылады және балалардың қауіпсіздігін қамтамасыз ету жөніндегі кешенді мемлекеттік шаралардың бірі.
Алтыншаш НӘСІПҚАЛИҚЫЗЫ
