Азаматтар жауапкершілікті өз мойнына алғанда – шындықтың өзі өзгереді

Елімізде жүздеген ауыл ерікті түрде алкоголь өнімдерін сатудан бас тартып жатыр. Бұл – қарапайым халықтың саналы таңдауы. Тәртіп, денсаулық және балаларының болашағы үшін жасалған қадам.

Мәселен, Маңғыстау ауданының бір ауылында тұрғындар спирттік ішімдіктерді сатудан бас тартқаны туралы жақында әлеуметтік желілерде видео жариялады. Мұндай бастамалар Ақмола, Жамбыл, Қарағанды, Атырау және басқа да облыстарда да байқалуда.

Иә, елдегі ауылдардың жалпы санын ескерсек, бұл теңізге тамған тамшыдай көрінуі мүмкін. Алайда, маңыздысы – оң өзгерістердің байқалуы. Мұндай ауылдардың саны күн санап артып келеді. Адамдар сенімге, тұрақтылыққа және тыныштыққа көбірек мән беріп, өздерінің жеке үлгілерімен бір-бірін шабыттандыруда.

Бұл бастаманы ақсақалдар мен Қоғамдық кеңестер көтеріп, прокуратура, полиция және жергілікті әкімдіктер қолдау көрсетті. Олар үйлестіру, алдын алу және қауіпсіздікті қамтамасыз ету жұмыстарын жүргізді.

Ерекше алғыс ауыл кәсіпкерлеріне айтылады. Олар жерлестерінің үндеуіне құлақ асып, алкоголь өнімдерін сатуын ерікті түрде тоқтатты. Күдіктер болғанымен, олардың табысы азайған жоқ. Керісінше, ауыл тұрғындары алкогольдің орнына балаларға пайдалы өнімдерді көбірек сатып ала бастады.

Нәтижелер мынадай:

• Бірқатар ауылда қылмыс деңгейі нөлге теңесті;
• Тұрмыстық жанжалдар жойылды;
• Жастар спорт пен саналы өмір салтын көбірек таңдай бастады.

Бұл – «Заң және тәртіп» қағидасының өмірде жүзеге асуының нақты көрінісі. Мұнда тәртіп қорқынышпен емес, сеніммен қалыптасады. Жаза арқылы емес, саналы таңдау арқылы орнығады.

Мемлекет басшысы атап өткендей, «Заң мен тәртіп – кемел демократияның іргетасы және құқықтық мемлекеттің негізі».

Біз болашақ үшін қамқорлық, қоғамдық келісім және заңға құрмет қағидалары негізіндегі кез келген бастаманы қолдаймыз.

Айта кету керек, ресми статистикаға сәйкес, осы жылдың үш айында алкогольдік масаң күйде жасалған қылмыстар саны азайған.

Берік АСЫЛОВ,
Қазақстан Республикасының Бас прокуроры