![Атырауда жоғалған әжей дін аман табылды 1 449640322 450849797702348 3627214209763372590 n e1719836202892](https://atr.kz/wp-content/uploads/2024/07/449640322_450849797702348_3627214209763372590_n-e1719836202892-780x470.jpg)
Атырауда жоғалған әжей дін аман табылды
Атырау қаласында қызметтік иттің көмегімен 72 жастағы Қызылорда облысының тұрғыны екі сағатта жедел табылды. Кіші инспектор-кинолог Айбар Батыров Рокки есімді қызметтік итімен азаматшаны Қазақстан теміржолы Атырау вокзалы маңынан іздеп тапты.
![Атырауда жоғалған әжей дін аман табылды 2 449502239 450849957702332 8005523404086142171 n](https://atr.kz/wp-content/uploads/2024/07/449502239_450849957702332_8005523404086142171_n.jpg)
Облыстық полиция департаменті баспасөз қызметінің хабарлауынша, 30 маусым күні түскі сағат 12:30 шамасында жоғалған әйелдің ұлы 102 арнасына хабар берген.
Оның айтуынша, жоғалған анасы сөйлей алмайды және психикалық ауытқуы бар. Ол сағат 9:00 шамасында «Химпоселек» шағынауданында туыстарының үйінен шығып кетіп, сол күйі хабарсыз кеткен. Туыстары оны өз бетімен іздеп көргенімен, іздеу жұмыстары нәтиже бермеген.
–Жедел қоңырау қабылдаған тәртіп сақшылары бірден жылдам әрекетке көшіп, егде жастағы әжейді іздеуді дереу ұйымдастырған. Полицейлер оның болуы мүмкін барлық жерді тексеруге кірісті. Кіші инспектор-кинолог Айбар қызметтік итімен бірге әйелді іздеуге жұмылды. Рокки азаматшаның киімінен шыққан иіс арқылы ізіне түсіп, нәтижесінде оны Қазақстан теміржолы Атырау вокзалы маңынан тапты, – дейді аталған департаменттің баспасөз қызметінің жетекшісі Мейірім Ердәулет.
Айта кету керек, табылған әжейдің туыстары полицейлерге жедел іздестіргені үшін ерекше алғысын білдіруде.
Алтыншаш ҚҰРМАШЕВА