Қазақстанда мұнай-газ саласы мамандарына арналған стандарттар жаңартылуда
Астанада мұнай-газ саласындағы мамандықтарға қойылатын талаптардың өзгеруі талқыланды. Кездесуге Энергетика министрлігі, кәсіподақтар мен ірі мұнай-газ компанияларының өкілдері, оның ішінде «ҚазМұнайГаз», Kazenergy қауымдастығы және ТШО (Теңізшевройл) компаниясы қатысты.
Кездесу саланың мамандарына арналған ережелер мен талаптарды – кәсіби стандарттарды жаңарту жұмысының бір бөлігі болды. Жұмысшы мамандықтарының жылы аясында мемлекет жұмысшы кәсіптерінің беделін арттыруды, сондай-ақ адамдардың өз дағдыларын дамытуына көмектесуді көздейді.
Энергетика вице-министрі Әлібек Жамауов үкіметтің басты мақсаты – әрбір маман өзінің кәсібінің маңыздылығын сезініп, даму мүмкіндігіне ие болуы екенін атап өтті. Жаңартылған стандарттар осы мақсатқа жетуге көмектеседі.
ТШО өкілі Камшат Байжанова саланың тез өзгеріп жатқанын – жаңа технологиялардың пайда болуына байланысты мамандарға қойылатын талаптардың да өзгеруі қажеттігін айтты:
— Бұл – маңызды әрі дер кезінде көтерілген бастама. Біздің сала технологиялық өзгерістердің, экологиялық сын-қатерлер мен еңбек нарығының трансформациясының әсерінен қарқынды дамып келеді. Сондықтан да біздің біліктілік шеңберлеріміз бен кәсіби стандарттарымыз осы өзгерістерге сай болуы тиіс, мамандарға бүгінгі және болашақтағы нақты талаптарды көрсетуі қажет, – деді Камшат Байжанова.
ТШО компаниясы соңғы 30 жылда мыңдаған қазақстандық мұнайшыларды оқытып, жергілікті мамандарды дамытуға 107 миллион доллардан астам қаржы салды. Бұл қаражат бұрғылау, қауіпсіздік, еңбекті қорғау және басқа салалар бойынша оқытуға жұмсалды.
Кездесу соңында қатысушылар 2025 жылдың соңына дейін кәсіби талаптардың жаңа тізімі әзірленетініне келісті. Бұл өзгерістер заманауи стандарттарға сай жұмыс істей алатын және мұнай-газ саласын болашақта дамытатын білікті кадрларды даярлауға мүмкіндік береді.
