Инклюзивті білім — мүмкіндіктер алаңы

Инклюзивті білім беру – мүмкіндігі шектеулі балаларды оқыту ғана емес, бұл сонымен қатар, болашақта экономикалық дамудың маңызды кепілі. 2020 жылдан бастап қазақстандық мектептер инклюзивті болды. Заң бойынша, елдің барлық азаматына жеке мүмкіндіктеріне қарамастан, білім берудің қолжетімділігіне кепілдік беріледі. Бірақ іс жүзінде инклюзивті білім беру мәселелері әлі де өзектілігін жойған жоқ.

Білім берудің осы бағытындағы түйіні шешілмеген түйткілдерді талқылау мақсатында Д.Қонаев атындағы «BINOM» мектеп-лицейінде облыстық “Асыл жүрек” конференциясы ұйымдастырылды. Бұл жолғы конференция – жоспар бойынша өтіп жатқан төртінші іс-шара екен.
Ы.Алтынсарин атындағы Ұлттық білім академиясының «Инклюзивті білім беру» орталығының директоры Светлана Ісмағұлова, Астана қаласындағы BINOM мектеп-лицейлері желісінің мамандары, облыстың білікті педагогтері тақырып төңірегінде маңызды зерттеулерімен, мазмұнды баяндамаларымен таныстырды.

Сонымен қатар үздік отандық және шетелдік педагогикалық тәжірибелерге негізделген шеберлік сыныптар өткізілді.
Өңірдің 300-ге жуық педагогі қатысқан іс-шара орта білімнің сапасын арттыруға септігін тигізетін ауқымды әрі нәтижелі жобалардың бірі болды.

Еркеназ ҚАЛИЖАН