Абылай әлем чемпионы атанды!

4-7 қазан күндері Ресей астанасы Мәскеуде панкратионнан әлем чемпионаты өтті. Кіл мықтылар бас қосқан дүбірлі додада жерлесіміз Абылай Төлеш байрағымызды көкке көтеріп, Әнұранымызды әуелетті.

Абылай іріктеу кезеңдерінде тәжікстандық және әзербайжандық қарсыластарын ұтқан болатын. Жартылай финалда Қырғыз спортшысын тізе бүктірді. Ал, ақтық сында жарыс қожайынына еш мүмкіндік бермей, чемпиондық белдікке ие болды.

Бұған дейін де спортшы талай самбо, жекпе-жек, панкратионнан өткен түрлі жарыстарда жеңіске жетіп үлгерген. Кәсіпқойлар арасында да бақ сынап жүр. Бүгінде қаламыздағы жаңадан ашылған «Мерген» жауынгерлік клубында жаттығады.

Мұратбек ЖАҢАБАЙ