Биылғы жылдың басты додасы – Оңтүстік Кореяның Пхёнчхан қаласындағы қысқы Олимпиада ойындары 9-28 ақпан аралығында өтетіні белгілі. Оған қазақстандық спорт делегациясы 9 спорт түрі бойынша ел намысын қорғап жатыр.
Осыған орай Индер ауданы әкімдігінің қолдауымен, аудандық денешынықтыру және спорт бөлімі, аудандық мәдениет және тілдерді дамыту бөлімі, аудандық білім бөлімі және Индер аудандық Жастар ресурстық орталығының бірлесіп ұйымдастыруыен 23-ші Қысқы Олимпиадаға Қазақстан атынан қатысушы спортшыларды қолдау акциясы өтті.
Қазақстан ұлттық құрамасы Қысқы Олимпиада ойындарына Тәуелсіз мемлекет ретінде 1994 жылдан бері тұрақты түрде қатысып келеді. Биылғы жылы отандастарымыз реттік сан бойынша ақ қар, көк мұз үстінде өтетін аламанға жетінші рет қатыспақ.
Осыған орай индерлік барша жиналғандарды алдымен аудан әкімі Серік Арыстан мен Қазақстанның құрметті спорт қайраткері Асқар Бәкенов құттықтап, жас спортшыларға сәттілік тіледі.
Акция барысында білім беру мекемесіне қарасты барлық мектеп оқушыларының қатысуымен шаңғы жарысы ұйымдастырылды. Бұл жарысты алғашқы болып аудан әкімі бастаған бір топ басшылар бастады.
150-ге жуық оқушылардың арасынан оқ бойы озық келген сайыскерлерді аудан әкімінің орынбасары Дарын Шамұратов марапаттап, естелік суретке түсті.
Беттері қызарып, ауыздарынан бу бұрқыраған оқушылар мен студенттерге жарыс соңында ыстық шәй мен бәліш таратылды.
Рафхат ЖҰМАБАЙ.
