Болашаққа — дені сау тіспен!
Атырауда Дүниежүзілік ауыз қуысының денсаулығын сақтау күні кең көлемде аталып өтті.
Өңірде дүниежүзілік ауыз қуысының денсаулығын сақтау күніне орай ұйымдастырылған шаралар легі үш күн бойы өтті. Ол халықтың тіс күтіміне деген жауапкершілігін арттырып, ауыз қуысының саулығының маңыздылығын насихаттауға бағытталды.
Алдымен, Атырау облыстық балалар стоматологиялық емханасының базасында тіс дәрігерлері, дантистер мен мектеп медбикелеріне арналған «Болашаққа – сау тіспен» атты семинар-конференция өтті. Бұл жиында ауыз қуысы гигиенасы, стоматологиялық аурулардың алдын алу және салауатты әдеттерді қалыптастыру мәселелері талқыланды.
Содан кейін Әл-Фараби атындағы «Binom» мектебінде студенттердің қатысуымен флэшмоб ұйымдастырылып, ауыз қуысы гигиенасы бойынша арнайы мультфильм көрсетілді. Сонымен қатар, оқушыларға тіс күтіміне арналған арнайы сабақтар өтті.
Тағы бір шарада ірі сауда орталықтарында келушілерге ауыз қуысы гигиенасы туралы ақпараттық парақшалар таратылып, тегін тіс пасталары мен щеткалары үлестірілді. Сондай-ақ, «Болашаққа – сау тіспен» жол картасының негізгі мақсаттары түсіндірілді.
Ақпараттық жұмыс ауқымды түрде жүргізілді. Қаладағы 13 LED-экранда бір апта бойы арнайы бейнеролик көрсетілді.
Бұдан бөлек, мектептерде 949 оқушыны қамтыған ауыз қуысы гигиенасы сабақтары өткізілді. Бұл бастама балалар мен жасөспірімдер арасында тіс күтімі мәдениетін қалыптастыруға зор үлес қосты.
Атырау қаласында өткен бұл іс-шаралар халықтың денсаулыққа деген көзқарасын жақсартуға бағытталған ауқымды қадам болды. «Болашаққа – сау тіспен!» ұранына сай, дені сау ұрпақ тәрбиелеу – басты міндет!
Айбөпе САБЫРОВА
