АТЫРАУҒА 40 МЫҢ ДАНАҒА ЖУЫҚ ҚЫЗЫЛШАҒА ҚАРСЫ ВАКЦИНА ЖЕТКІЗІЛЕДІ
Атырау облысына біріктірілген вакциналар ККП – қызылша, қызамық және эпидемиялық паротитке қарсы 39 мың 900 данасы жеткізіледі, деп хабарлайды atr.kz тілшісі облыстық денсаулық сақтау басқармасының баспасөз қызметіне сілтеме жасап.
«Қазіргі кезде облыста вакцинаның 7 мың дозасы бар. Қараша айының 15-не дейін 39 мың 900 дозасы жеткізіледі деп күтілуде. Қосымша иммундауға 30 мың дана вакцина тапсырыс берілді», — деп хабарлады баспасөз қызметіндегілер.
Еліміздің бас санитар дәрігері Айжан Есмағамбетова қызылша ауруының белең алуына байланысты балаларды қызылшаға қарсы қосымша иммундау басталатынын айтты. Өйткені науқастанғандардың 65 проценті 5 жасқа дейінгі балалар. Жалпы алғанда, бұл «ковид» жылдары туған балалар. Келесі аптада елімізде 6-11 ай аралығындағы сәбилерді қосымша иммундау басталады. Ал 2 жастан 5 жасқа дейінгі бүлдіршіндерге желтоқсан айының басында вакцина егіледі. Айта кетейік, Атырау облысында 2-5 жас аралығында 65 мың 896, ал 6-11 жас аралығында 93 мың 863 бала бар.
Облыстық денсаулық сақтау басқармасы баспасөз қызметі берген мәлімет бойынша, облыста 862 адам қызылша ауруын жұқтырған.
