Жақсылықтың жаршысы болған мереке

Ұлық мереке Наурызды қала маңындағы Құрманғазы ауылының тұрғындары да тамаша көңіл-күймен қарсы алды. Ауылдық мәдениет үйінің алаңында Наурыз тойын тойлауға келген жұртшылықтың қарасы қалың болды.

Мәдени шараның шымылдығын түрген ел ағасы Аманбай Садықов барша халыққа ақжарма тілегін арнады.

-Ұлағаты мол осы дәстүрлі мереке әр шаңыраққа ырыс пен құт әкелсін! Ел игілігі үшін еңбек еткен құрманғазылықтардың қазаны дәмге, қамбасы дәнге толып, ел-жұрт бейбіт де баянды ғұмыр кешсін, — деп, ауыл ақсақалы ақ батасын жолдады.

Мұнан соң Құрманғазы ауылдық мәдениет үйінің меңгерушісі Гүлнар Сабирова асыға жеткен мерейлі мерекемен жұртшылықты құттықтап, әр шаңыраққа құт-береке, ынтымақ пен бірлік тіледі.

Мерекелік шара концерттік бағдарламаға ұласып, ауыл халқы ұлттық ойындарды тамашалады. Ал, сайыстарда бақтарын сынаған белсенділердің қанжығасы майланып, олжалы болды.

Майра ОРАЗҒАЛИЕВА