Атырауда кітапхана түні өтті

Ғ.Сланов атындағы Атырау облыстық ғылыми әмбебап кітапханасында «Кітапхана түні» атты іс-шара өтті. Іс-шараның мақсаты – кітап пен мәдениетке қызмет етіп келе жатқан кітапханашылардың кәсіби мерекесін атап өту, сала мамандарына құрмет көрсету болды.

Мерекелік кеште облыс әкімінің орынбасары Дарын Шамұратов құттықтау сөз сөйлеп, бірнеше қызметкерге «Мәдениет саласының үздігі», «Қазақстанның құрметті кітапханашысы» төсбелгілерін және ҚР Ұлттық академиялық кітапханасының Алғыс хатын табыстады. Сонымен қатар, облыстық мәдениет және тілдерді дамыту басқармасының орынбасары Әсия Қыстаубаева және Салалық Мәдениет, спорт және ақпарат қызметкерлерінің кәсіптік одағының Атырау облысы бойынша төрайымы Гүлнар Шайхашева сала мамандарын құттықтап, арнайы марапаттар тапсырды.

Іс-шара барысында «Бестселлер кітаптар көрмесі», «ART-ӘЛЕМ» қолөнер шеберлерінің көрмесі, «SELFIE TIME» фотозонасы, «BOOK QUIZ» интеллектуалдар сайысы ұйымдастырылды, сондай-ақ өнерпаздардың концертімен жалғасты.

«Кітапханашылар күні» – тек кәсіби кітапханашылардың ғана емес, кітапсүйер қауымның, кітап пен мәдениеттің дамуына үлес қосып жүрген барша жандардың мерекесі. Кітапхана қызметкерлерінің еңбегі мен қызметі көпшілік тарапынан ерекше бағаланып, оларды қолдауға арналған бұл мереке шығармашылық ізденістерге шабыт береді.

Тоғжан ЕРЖАНҚЫЗЫ