Атырауда қала жолдары қаншалықты қауіпсіз?
Атырау қаласы мен оның аумағындағы елді мекендер бойынша автокөлік жолдарының ұзындығы 1 635 шақырымға жуықтайды. Олардың тең жарымынан астамына немесе 1 553 шақырымына тас жол төселген. Қалған 81,9 шақырымы тас жол төсеуді қажет етеді. Жалпы жолдардың 95%-ы қатты жабындымен қамтылған. Жақсы және қанағаттандырарлық жағдайдағы жолдардың ұзындығы 1 114 шақырымды немесе 75%-ды құрайды. Бұл туралы Өңірлік коммуникациялар қызметінің баспасөз алаңында баяндалды.
Әрине, жыл санап жобаланып, жоспарланып, жүзеге асырылып жатқан жұмыстар да баршылық. Мәселен, өткен жылдың өзінде шаһардың 60-қа тарта көшесіне жалпы ұзындығы 50 шақырым шамасында тас жол төселді. Бұл жолдар қалаға қарасты Еркінқала-2, Зарослый-1, Алмалы 2 елді мекендерін қамтыды. Бұдан бөлек «Нұрсая» шағынауданы №16 көшесі мен Бейбарыс және Әбілқайыр хан даңғылдарын байланыстыратын 1,3 шақырымнан астам асфальт жол салынды.
– Күн тәртібінен түспейтін өзекті мәселенің бірі – қаладағы көлік кептелісінің алдын алу мақсатында қолданыстағы автокөлік жолдарын кеңейту арқылы, өткізу қабілеттігін арттыру жұмыстары қолға алынды. Осылайша Азаттық даңғылы мен Датов көшесі қайта жаңғыртылды. Осындай жұмыстар Бигелдинов, Гагарин, Жастар көшелері мен Еркінқала ауылы аралығына, Әбілқайыр хан даңғылын «Сарықамыс» шағынауданымен жалғастыратын Жастар көшесіне дейінгі учаскеде де жүргізілді. Жоба бойынша қайта жаңғыртылуға тиісті 13,4 шақырым жолдың 8,7 шақырымы жаңғыртылды. Биыл бұл жұмыстар одан әрі жалғасады, — деді Атырау қалалық жолаушылар көлігі және автомобиль жолдары бөлімінің басшысы Еркебұлан Аққұсов.
Биыл да көлік инфрақұрылымын дамыту бағдарламасы аясында «Самал», «Өркен», «Атырау», «Береке» шағынаудандарына, Еркінқала, Алмалы, Қайыршақты, Дамбы, Атырау ауылдық округтеріндегі 162 көшеге жалпы ұзындығы 66,8 шақырым жол төсеу жоспарланған. Аталған нысандарды жобалау жұмыстарын «Улмад» ЖШС жүзеге асыруда. Осы жобалар шеңберінде №5 сүзгілеу станциясы мен оң жақ жағалауда орналасқан кәріз тазалау имараты бағытына жол салу жобаға енгізілген.
Бұл жұмыстардың орындалуына жауапты бас мердігер мекеме ретінде «ZANGAR SG» ЖШС анықталған. Сол сияқты Бейбарыс даңғылынан Атырау-Астрахан трассасы аралығына дейінгі 2,8 шақырым тас жол құрылысын жүргізу міндеті «МКДСМ» ЖШС-іне жүктелген. Өзге де жоспарланған жұмыстар жеткілікті.
Дәулетқали АРУЕВ
