Атырауда пәтер иелері кооперативтерінің мәселесі қаралды

Елімізде тұрғын үй қоры мен кондоминиум нысандарын басқару жүйесінде жүзеге асырылып жатқан реформалар мен енгізілген өзгерістерге қарамастан бұл салада пәтер иелері кооперативтеріне жүктелер міндет пен жауапкершілік жеңілдеген жоқ. 

Олардың атқаратын жұмыс ауқымы да азаймай тұр. Десек те, мұнда қордаланған проблемалар, шұғыл шешімін күткен өзекті мәселелер де жеткілікті.

Қазақстан Халық Партиясы Атырау облыстық филиалының ұйымдастырған “Дөңгелек үстел» отырысының күн тәртібіне шығарылып, жан-жақты талқыға түскен басты тақырып та осы болды. Ашық диалог форматында өткен басқосуды филиал  төрағасы Балжан Досмұхамбетова ашып, шараның маңыздылығына тоқталды.

Жиынға қатысқан Атырау қаласы бойынша пәтер иелері кооперативтері бірлестігінің,  облыстық құрылыс басқармасының,  төтенше жағдайлар департаментінің, қалалық тұрғын үй-коммуналдық шаруашылық және тұрғын үй инспекциясы бөлімінен мен құрылыс бөлімінен, басқа да мәселеге мүдделі мемлекеттік құрылымдардың, сондай-ақ ПИК-тердің басшылары туындаған сауалдар төңірегінде түсінік беріп, жауап  қайтарды. Олар негізінен көпқабатты тұрғын үйлердің инженерлік коммуникацияларын жөнге келтіру, терможаңғыртудан өткізу, ескірген электр желілері мен тозығы жеткен су, жылу, газ құбырларын жаңарту, т.б. жайында өрбіді.

Дәулетқали АРУЕВ