Ұлттық құндылық ұмытылмауы керек!
Атырауға келген «Ұлттық құндылық. Қазақ этнографиясы. Зейнолла Сәнік – 90 жыл» атты республикалық экспедицияның мүшелері Х.Досмұхамедов атындағы Атырау университетінде ұстаздар қауымымен және студенттермен кездесті. Қазақстан жазушылар одағының бастамасымен жүзеге асқан жоба еліміздің түкпір-түкпірін аралап, халқымыздың бай мұрасын зерттеуді көздейді.
Шарада Қазақстан жазушылар одағының Басқарма төрағасының орынбасары Қасымхан Бегманов, этнограф-ғалым Ахмет Тоқтарбай, қоғам қайраткері Әміржан Қосанов, «Зейнолла Сәнік» қорының атқарушы директоры, айтыскер ақын Серік Қалиев, Зейнолла Сәніктің ұлы, қор құрылтайшысы, меценат –Қанат Зейноллаұлы қазақ этнографиясын дамыту бағытында сөз қозғады.
–Белгілі жазушы, этнограф Зейнолла Сәніктің мерейтойы аясында ұйымдастырылған бұл арнайы экспедиция ұлттық рух пен тарихи сананы жаңғыртуға бағытталған. Жоба барысында қазақ халқының салт-дәстүрлері, әдет-ғұрыптары мен этнографиясы дәріптеледі. Бұл сапардың мақсаты – Зейнолла Сәніктің бай мұрасын, ғылыми әрі шығармашылық еңбектерін халыққа насихаттау және ұлттық құндылықтарды дәріптеу. Осы тұста республикалық экспедицияның қолдаушысы «Зейнолла Сәнік» қоғамдық қоры екенін де ерекше атап өткім келеді, — деді Қазақстан жазушылар одағының Басқарма төрағасының орынбасары Қасымхан Бегманов.
Х.Досмұхамедов атындағы Атырау университетінің Басқарма төрағасы-ректор Саламат Идрисов аталған қордың қолдауымен Атырау университеті гуманитарлық ғылымдар және өнер факультетінің дәрісханасынан жазушы, этнограф-ғалым Зейнолла Сәнік атындағы арнайы аудитория ашылатынын хабарлады.
Қазақстан жазушылар одағы мен «Зейнолла Сәнік» қоры бірлесіп, еліміздің бірқатар өңірінде білім алатын жас ақын-жазушыларға шәкіртақы тағайындаған болатын. Шарада Атырау университеті көптілді білім беру факультеті қазақ тілі мен әдебиеті пәні мұғалімі мамандығында оқитын III курс студенті Ербекет Мағауияға аталған шәкіртақының сертификатын табыстады.
Майра ЕРҒАЛИ
