Бес бөтелкеге — балмұздақ: Атырауда ерекше экобастама жүзеге асты

Admin03.08.2025 20:02

Атырау қаласында қоршаған ортаға қамқорлықты насихаттайтын, қалдықтарды қайта өңдеуге бағытталған ерекше экологиялық іс-шара ұйымдастырылды. “Таза Қазақстан” жалпыұлттық экологиялық акциясы аясында “Жасыл ел” ұйымы тұрғындар арасында экологиялық мәдениетті қалыптастыруды мақсат етіп, көпшілікті жұмылдырған акция өткізді.

Игі шара 3 тамыз сағат 19:00–20:00 аралығында Атырау қаласындағы Қайыршақты және Алмалы ауылдық округтерінде өтті. Акцияға қатысу шарттары өте қарапайым: 5 пластикалық бөтелке тапсырған әр қатысушыға 1 балмұздақ ұсынылды. Бұл бастама балалардың ерекше қызығушылығын туғызып, олар белсенділікпен қатысты.

Атырау қалалық әкімдігінің баспасөз хатшысы Ғасырбек Төлегеннің айтуынша, акцияның басты мақсаты — экологиялық мәдениетті арттырумен қатар, тұрмыстық қалдықтарға, әсіресе пластикалық бөтелкелерге екінші өмір сыйлау.

-Бұл шара Қайыршақты, Алмалы ауылдық округтерінде жүзеге асырылды. Қайыршақты округінің өзінде 10 мыңға жуық пластик бөтелке жиналды. Барлық жиналған қалдық қайта өңдеу орындарына жіберіледі. Бұл — Атырауда алғаш рет ұйымдастырылған ауқымды экологиялық акция. Қоршаған ортаның тазалығын сақтау жұмыстарына тұрғындар өте белсенділік танытты, — деді Ғасырбек Төлеген.

Бұл бастама арқылы ұйымдастырушылар жастарды табиғатты аялауға, тұрмыстық қалдықтарды сұрыптауға және қайта өңдеуге үйретуді көздейді. Атырау қаласындағы халық тығыз орналасқан ауылдық округтер таңдалып, іс-шараның тиімділігі арта түсті.

Ұйымдастырушылардың айтуынша, мұндай игі шаралар алдағы уақытта да жалғасын табады. Бұл тек экологиялық мәдениетті қалыптастыру ғана емес, сонымен қатар ел болашағы — жастардың табиғатқа деген жауапкершілігін нығайтудың тиімді жолы болмақ.

Қоршаған ортаның тазалығы – әр адамның жауапкершілігінен басталады. Осындай игі бастамалар арқылы тұрғындардың, жас ұрпақтың экологияға деген құрметі артып, келешек буынға таза табиғат қалдыру мүмкіндігі ұлғая түспек.