1 сағаттың ішінде 30 мың пластикалық бөтелке жиналды

«Таза Қазақстан» жалпыұлттық экологиялық акциясы аясында «Жасыл ел» жастар жасағының бастамасымен Еркінқала ауылдық округінде кезекті экологиялық іс-шара ұйымдастырылды. Тек 1 сағаттың ішінде ауыл тұрғындары мен балалардың белсенділігінің нәтижесінде 30 мыңға жуық бос пластикалық бөтелке жиналды. Бұл туралы Атырау қалалық әкімдігінің баспасөз хатшысы Ғасырбек Төлеген хабарлады.

Іс-шара барысында балаларға ынталандыру ретінде арнайы сыйлықтар ұсынылды. Он пластикалық бөтелкеге – 1 балмұздақ, 5 пластикалық бөтелкеге 5 оқу дәптері берілді.

Балалардың бірі балмұздаққа қуанып жатса, енді бірі іні-қарындасына оқу құралдарын сыйлап, қуанышпен бөлісті.

Жиналған барлық бөтелке сол сәтте қайта өңдеу орнына жөнелтілді. Бұл жұмыс – тұрмыстық қалдықтарды табиғатқа тастамай, жас ұрпақтың бойында экологиялық мәдениетті қалыптастыруға бағыттайды.

Экологиялық акция соңында балалар мен жастар спорттық ойындарға қатысып, қоршаған ортаға деген жауапкершілікті ойын арқылы ұғынды.

А.НӘСІПҚАЛИҚЫЗЫ