Жаңа марка нарыққа шықты

Кондитерлік өнімдер, медициналық пакеттер мен сұйықтық сақтауға арналған ыдыстарға шикізат енді өзімізден шығарылады. «Kazakhstan Petrochemical Industries Inc.» компаниясы полипропилен өнімдерінің қатарын кеңейтіп, өңдеушілерге он екінші — PP H085CF/7 маркасын ұсынып отыр. Жаңа марка cast-полипропилен үлдірін шығаруға арналған. Ол күнделікті тұрмыста кеңінен қолданылмақ.

Компанияның баспасөз қызметі хабарлағандай, CPP үлдірінің басты артықшылығы – қаптаманың ішіндегі ылғалдылықты реттеуге болатындығында. Бұл өнімнің сақтау мерзімін ұзартуға мүмкіндік береді. Мысалы, мұндай қаптамадағы нан бірнеше апта бойы бүлінбейді. Яғни, балама қаптамалардан әлдеқайда тиімді болады. Сондай-ақ үлдір конденсаттың түзілуіне жол бермейді, ішіндегі өнім кеуіп кетпейді, бактериялардан қорғайды. 

–PP H085CF/7 маркасы зертханалық сынақтардан сәтті өтіп, алғашқы клиенттердің оң бағасын алған. KPI елімізде де, шетелде де заманауи өңдеуші компаниялардың талаптарына сай өнімдерді шығаруға жұмыстана береді, — дейді компанияның баспасөз хатшысы Алтынай Серікбай.

Айбөпе МҰРАТҚЫЗЫ