Өндірісті қолдауға бағытталған бағдарламасы іске қосылды
Атырау облысында жергілікті кәсіпкерлерді қолдауға бағытталған «Атырау өнімі» атты жаңа өңірлік бағдарлама іске қосылды. Бұл бастама – өндірісті дамыту, өңірлік өнім көлемін ұлғайту және кәсіпкерлікті жүйелі түрде қолдаудың нақты тетігі,-деп хабарлайды Өңірлік коммуникациялар қызметі.
Бағдарлама аясында тек Атырау және Құлсары қалаларында тіркелген кәсіпкерлерге жылдық 7% жеңілдік мөлшерлемемен 70 миллион теңгеге дейін несие алу мүмкіндігі қарастырылған. Қаржыландыру жаңа өндіріс орындарын ашуға, сондай-ақ жұмыс істеп тұрған кәсіптерді кеңейтуге бағытталады.
— Бағдарлама Атырау облысы әкімінің қолдауымен іске асырылуда.
Оның аясында өңір кәсіпкерлерін қаржыландыру және демеу мақсатында жергілікті бюджеттен 1 миллиард теңге бөлінді. Қазір бұл қаражат «Аграрлық несие корпорациясы» арқылы шағын және орта бизнесті несиелендіру бағытында игерілуде. Бағдарлама шеңберінде құжаттар қабылдау жұмыстары жүргізілуде,- деді облыстық Кәсіпкерлік және өнеркәсіп басқармасы басшысының м.а. Нұрдәулет Жұмаситов.
Кәсіпкерлер толық ақпарат пен кеңесті Атырау облыстық Кәсіпкерлік және өнеркәсіп басқармасынан немесе «Аграрлық несие корпорациясының» аймақтық филиалынан ала алады.
