Газ саласы кешенді жаңғыру жолында

Президент Қасым-Жомарт Тоқаевтың газ саласын дамыту жөніндегі тапсырмаларын орындау аясында атқарылып жатқан жұмыстар елдің энергетикалық қауіпсіздігін нығайтуға және экономиканы тұрақты өсіммен қамтамасыз етуге бағытталып отыр.

Біріншіден, жаңа кен орындарының өнеркәсіптік пайдалануға берілуі – ресурстық базаны кеңейтіп қана қоймай, газ саласының өзіндік құнын төмендетіп, ішкі нарықты тұрақты әрі қолжетімді газбен қамтамасыз етуге мүмкіндік береді. Бұл әсіресе әлеуметтік маңызы бар секторлар мен халық үшін өте өзекті.

Екіншіден, газды қайта өңдеу инфрақұрылымының дамуы (Қашаған мен Қарашығанақтағы зауыттар құрылысы) – елдің мұнай-газ секторындағы қосылған құнды арттыруға жол ашады. Бұл – шикізаттық экспортқа тәуелділікті төмендетудің және отандық өнім өндіру көлемін арттырудың нақты тетігі.

Үшіншіден, «Бейнеу — Бозой — Шымкент» магистральдық газ құбырының екінші желісі – газ тасымалдау жүйесінің сенімділігін арттырып, еліміздің оңтүстігі мен оңтүстік-шығысындағы тұтынушылар үшін энергия қауіпсіздігін қамтамасыз етеді. Сонымен қатар бұл жоба өңіраралық теңгерімді сақтау тұрғысынан стратегиялық маңызға ие.

Төртіншіден, 2029 жылға дейінгі газ саласын дамытудың кешенді жоспары жүйелі әрі ұзақ мерзімді көзқарасты білдіреді. Мұндай тәсіл газ саласын жоспарлы түрде әртараптандыруға, инвестициялар тартуға және жаңа жұмыс орындарын ашуға мүмкіндік береді.

Қорытындылай келе, қазіргі таңда жүзеге асырылып жатқан жобалар — Қазақстанның газ саласындағы қуатын күшейтіп, ішкі нарықты тұрақтандырып және экспорттық әлеуетті арттырады. Ең бастысы — бұл бастамалар халықтың өмір сүру сапасын жақсартуға және өңірлік даму теңгерімін сақтауға нақты үлес қосады.

Балжан ДОСМҰХАМБЕТОВА, 

қоғам қайраткері