Атырауда ҚҚС төлеушілер қатары артпақ
Облыста қосылған құн салығын (ҚҚС) төлеушілердің қатары көбеймек. Бұл туралы жанама салықтарды әкімшілендіру басқармасының бастығы Арлан Бурумбаев баспасөз мәслихатында мәлімдеді, — деп хабарлайды Өңірлік коммуникациялар қызметі.
ҚҚС – қосылған құнға салынатын жанама салық, ол кәсіпкерлік субъектілерінің тауарлар мен қызметтерді өткізуінен түсетін кіріске салынады. ҚҚС төлеушілерге жылдық айналымы белгіленген шекті мөлшерден асатын заңды тұлғалар мен жеке кәсіпкерлер кіреді.
– Қазір өңірде осыған байланысты тіркелген 5 мың адамның 2 мыңнан астамы қосымша құн салығын төлеуі тиіс. ҚҚС бойынша енгізілетін жаңа өзгерістерге сәйкес мемлекет салық мөлшерін 12%-дан 16%-ға дейіе өсірсе, облыстағы құн салығын төлеушілердің саны 5 мыңнан 25 мыңға дейін артады деген болжам бар,- деді А.Бурумбаев.
Спикердің айтуынша, өңірде салық саясатын жетілдіру және кәсіпкерлерді қолдау бағытында жүйелі жұмыстар жүргізілуде. ҚҚС төлеушілер санының артуы бюджетке түсімін ұлғайтып, әлеуметтік және инфрақұрылымдық жобаларды қаржыландыруға мүмкіндік береді.
