Энергосекторды жаңғырту — уақыт талабы

Қазақстан Үкіметінің 2024 жылғы 25 желтоқсандағы қаулысымен «Энергетикалық және коммуналдық секторларды жаңғырту» ұлттық жобасы бекітілгені белгілі.

Ұлттық жобаның мақсаты – халыққа коммуналдық қызметтердің сенімді әрі сапалы ұсынылуын және ел экономикасының орнықты дамуын қамтамасыз ету үшін республикадағы энергетикалық және коммуналдық инфрақұрылымды (желілер мен объектілерді) жаңғырту болып табылады.

Бұл жөнінде Ұлттық экономика министрлігі Табиғи монополияларды реттеу комитетінің Атырау облысы бойынша департаментінің басшысы Арман Өтегенов мәлімдеді.

Оның айтуынша, аталған жобаға өңірімізден «Атырау жылу жүйелері» және «Атырау Жарық» жауапкершілігі шектеулі серіктестіктері қатысуда. Осылайша, аймақты электр энергиясымен жабдықтаушы кәсіпорын – «Атырау Жарық» ЖШС бойынша ұлттық жоба аясында 2025 жылға құны 1,3 млрд. теңгені құрайтын қосымша инвестициялық бағдарлама бекітілді.

Соған сәйкес, облыс аумағында жалпы ұзындығы 70 шақырымнан асатын электр желісін жөндеуден өткізу жоспарлануда. Сонымен қатар, келесі жылға «Атырау жылу жүйелері» ЖШС-нің 4,5 млрд. теңгеге және «Атырау Жарық» серіктестігінің 30 млрд. теңгеге бағаланған жобалары жергілікті атқарушы органдармен келісу сатысында тұр.

Дәулетқали АРУЕВ

Сурет: gov.kz