Қазақстан мектептерінде жасанды интеллект енгізіледі
Қазақстанда білім беру саласындағы жаһандық үрдістер мен халықаралық үздік тәжірибелерді ескере отырып, жалпы білім беретін мектептерге жасанды интеллект (AI) элементтері кезең-кезеңімен енгізілмек. Бұл туралы республика Оқу-ағарту министрлігінің баспасөз қызметі хабарлады.
Министрліктің мәліметінше, жүйе еліміздің білім беру ерекшеліктері, педагогтердің пікірі және оқушылардың қажеттіліктері жан-жақты ескеріле отырып әзірленуде.
Оқу-ағарту министрі Ғани Бейсембаевтың айтуынша, жасанды интеллект элементтері алдымен «Цифрлық сауаттылық» және «Информатика» пәндеріне енгізіледі. Бұл бағытта AI-ды қолдануға қатысты этикалық стандарттар да бекітілген.
Оқушылар үшін Day of AI атты онлайн-курстар, ал мұғалімдер үшін үш деңгейлі біліктілікті арттыру бағдарламасы әзірленеді. Бұл – болашақ ұрпақты заманауи технологияларға бейімдейді.
Министрдің мәлімдеуінше, жаңа форматтағы «Келешек мектептерін» басқару мәселесінде де өзгеріс бар. Мемлекет басшысының тапсырмасына сәйкес, жаңа басқару стандарты дайындалып, ұлттық жобадағы мектептерде жұмыс істейтін 3 мыңнан астам педагог үш деңгейлі оқудан өтті.
Аталған басқару моделі 2025 жылдың қыркүйегінен бастап іске қосылады. Жобаның әдістемелік сүйемелдеуін Ы.Алтынсарин атындағы Ұлттық академия қамтамасыз етпек.
Алтыншаш ҚҰРМАШЕВА
